Trueba ikastetxean sinesten dugu espazioek hezten dutela. Espazio fisikoek harreman-moduak, emozioak eta identitateak eratzen dituzte. Horregatik, gure jolastokia eraldatzea ez da obra estetiko bat soilik izan, baizik eta hezkuntza-komunitate osoaren arteko eraldaketa sozial eta pedagogiko bat.
Ken Robinson-ek zioen hezkuntzak “kreatibitatea eta pentsamendu autonomoa elikatu behar dituela”. Eta hori ez da soilik gelaren barruan egiten: jolastokia espazio pedagogiko funtsezkoa da, non haurrek elkar ezagutzen duten, gatazkak kudeatzen dituzten eta askatasunez esploratzen duten.
María Montessori-k azpimarratzen zuen ingurune fisikoa “umeak izaki oso gisa hazteko” ezinbesteko osagaia dela. Espazio irisgarri eta aberats batek autonomia, konfiantza eta bizikidetza sustatzen ditu. Jolastokia ez da atsedenaldirako tarte bat soilik: bizitzaren parte aktiboa da.
Gure patio berria haur guztientzat sortua bada ere, ez da haientzat bakarrik. Intergenerazionala da, hau da: adinen arteko bizikidetza sustatzen duen espazioa. Txikiek jolaserako eremu moduan ikusten dute, esplorazio eta mugimendurako gune. Baina adineko ikasleentzat —eta baita helduentzat ere— topagune lasaigarri, atsedenleku eta segurtasun-eremu bihurtzen da.
Adin bakoitzak patioan bere tokia du, eta horrek balio komunitario sendoagoa eraikitzen du.
Espazio fisiko bat aldatzeak eskolaren kultura hezitzailea alda dezake. Patio inklusibo eta anitz batek aukera ematen du genero-rolak deseraikitzeko, zaintza partekatuaren praktika sustatzeko eta haur guztien parte-hartzea bermatzeko, bere gaitasun eta erritmoetatik abiatuta.
César Bona-k dio: “Eskola eraldatzeko lehen urratsa haren espazioak birpentsatzea da”. Eta horixe egin dugu: espazio bat eraiki, guztion artean, guztiontzat — eta adin guztientzat.
“Garrantzitsua iruditzen zitzaigun kirol nagusien bidez harremanik sortzen ez duten haurrek ere beraientzako espazio propioa izatea, eta patio berriak aukera hori ematen die.”
— Guraso bat
“Gune bakoitzak aukera ezberdinak eskaintzen ditu: jolas librean eta harremanetan sakontzeko egokia da.”
— Irakasle bat
“Eszenatokia asko gustatu zaigu! Egun batean kontzertu bat egin nahi dugu lagunekin.”
— Ikasle bat, LH2
